Dor Gaffee is fertsch...

Dor Gaffee is fertsch...

...auf zum Sonntagsbrunch nach Borna bei Leipzig.



https://www.youtube.com/watch?v=LeJtmolrZLQ

’S Gaffegeschbänsd
Am Lilichenschdeene um Middornachd
da laadschd ä Geschbänsd dorchen Fälsenschachd.
Das rasseld mid ärchendwas forchbar dord rum.
De Leide, die flisdorn: “Jedz gehds wiedor um!”
Nu hädde ja manchor rächd gerne erfahrn,
was bloß dor Geisd rumwärchd schon seid soviel Jahrn.
Gee Mänsch in dor Geechend gonnd sich das erglähr,
was där in dor Schluchd drinne hadde ze mährn.
Bis endlich mal eenor, Baul Borbsich aus Bärne,
sich ranschlich mid Muhd un Vordraun zu sein Schdärne.
Gaum dasses vom Gärchdorm dahd Middornachd schlaachen
gahm bingdlich ’s Geschbänsd in ä Hemd ohne Graachen.
Dä gnochichen Fingor umgramfden ä Dobb,
ä Schbiridusgochor druhgs ohm uff sein Gobb.
Dann säddsde sich’s hin undorn Lilichenschdeen
un braude sich Gaffee. Nee, roch där scheen!
Befeiord vom Dufde dor geddlichen Drobben
fing Baul an ze blähgen: “He, mir ooch ä Schobben!”
Hieruff gabs ä Gnall un dor Geisd war vorschwunden.
Baul Borbsichen hamse am Morchen gefunden.
Där saß schwär vorbriehd in nor Gaffeelache.
Das war dem geschdeerden Geschbänsd seine Rache.

Lene Voigt