giftig

giftig

ist das Bilsenkraut, aber schön. Bei Burg Fleckenstein/Elsass, an einer benachbarten Ruine erstmals gesehen 2010.
Anbei eine passende südsaarl. (rheinfränkische) Mundartgeschichte von mir:

Wie de Hobbe ins Bier komm iss

Frieher, also soo vor dausend Jòhr, dòò war im Bier noch so e giffdisches Hexekreitsche drinn - es Bilsekraut. Von demm kommt aach der Name „Pils“. Un net von dem Ort Pilsen in de Tschechei. Der is nämlisch aach nòò’ m Bilsekraut genennt genn. Un guddes Bier gebbd’s jòò heit noch in Pilsen. Das giftisch Kreitsche, das Bilsekraud, hadd awwer frieher de Rausch noch e gudd Schdigg schdärker gemacht. Die Kontroll hadd mer dòòdemet noch leichder verlor. Sogar de Kaader hinnenòòh war beeser.
Awwer dann iss vòr neinhunnerd Jòhr die heilisch Hildegaad kòmm. Die hadd sich jòò gudd met de Planze ausgekennt, un die hadd genau gewissd, gäje welches klääne òdder grooße Meggelche welches Plänzje helfe dudd. Un ich denk mir die Geschicht mòòl soo:
Die Hildegaad hadd wohl effdersch erlääbt, dass e Mudder met de Kinner bei se komm iss, die vom besoffne Mann g r i e n un b l ò ò geschlaa genn waare. Dòò iss der Hildegaad uff äänmòl - de Hobbe inngefall. Manche von uns, meischdens Fraue, nemme jòò Tabledde met dem scheene Name Nervenruh – dòò drinn iss aach Hobbe ! Un dòò hadd die Hildegaad mòòl äänfach auspro-wiert, ob der Hobbe im Bier schmegge duut un wie der wirgt. Un wie’ s gudd genn iss, hadd se fier das neije Bier-Rezebbd gudd Reklaame gemach. Bis se’s all ausprobiert hann - un gudd gefunn hann. Un se hadd aach dòòfier gesorscht, dass das giftisch Bilsekraut nimméé gehòll genn durft. Dòòdefier allään misst mer de Hildegaad schon de Heilischeschein verpasse - dass se unser Männer brav gemacht hadd. Un nääwebei aach e bissje dick un gemietlisch. Nadierlich duut de Algehool seins, das es Gewicht enuff geht, klar! Awwer heit wääß mer jòò aach, dass im Hòbbe ebbes drinn is, das wie die weibliche Hormone wirgd. Un dòòdemet grien unser Männer denne scheene Bierbauch, wie wenn se schwanger wäre. Un manche bringe’s sogaar me’m Biertringe zu me klääne Buuse.
Im 13. Jòhrhunnert hadd die Kersch die Sach met dem Hòbbe im Bier jòò sogar zum Gesetz erhob! Zum deutsche Reinheitsgesetz fier’s Bier. Gebbt’s ään äänzich annares Gesetz, das wo sich sooo lang gehall hädd --- seit em 13. Jòòrhunnert? Ach, un die Kersch war dòmòls jòò in ville Orde de greeschde Grundbesitzer. Un solang die arme Bauere noch e Gròsche fier’s Bier hòdde --- hann se bei dem gudde Hobbe im Bier nett so schnell Rabbatz geschlaa geeje die hohe Schdeire un Abgaawe... - Soovill mòl zu unsrer lebendich Geschichde!
Jedsd hadd jòò die Eurobäisch Union am Reinheitsgesetz erumm geknabbert, mer heert sogaar, dass de neije Hobbe-Extragt seit letscht Jòhr (2009) gar nemmee de selwe is. Ausgerechend der Beschdanddääl, wo beruhicht, is weg, nur der leicht bittre Geschmackschdoff is geblieb. Tybbisch Eurobäisch Union! Also wunnern Eich net, wenn Ihr oowends uff äänmol e Bier mee brauche fier innzeschloofe. Nur im Bio-Bier is noch de altmodische Hobbe-Extrakt drin. Un ich hoffe mòl, dass aach vill klääne Wertschafts-Brauereie bei der alt Redsebduur bleiwe.
Na ja --- awwer wenn mer heit die Schnappslimo sieht, die die Junge aange-drääd krien, bis se sich ins Kooma saufe – dòò kann mer doch nur noch saan:
HOBBE UN MALZ - GOTT ERHALTS