I Va in Merica

I Va in Merica

Berto Barbarani, poeta dialettale 1872/1945. Statua in bronzo sita in Piazza delle Erbe, Verona, opera di N. Finotti.
Dedicata a Isabella Bertoldo, Veronese ed Adriana Lissandrini,Veneta; a Simona e Paolo Sagnotti, Romani, a mio figlio, quasi Piemontese.
Alla nostra Repubblica, sempre più povera.

---------------------
I VA IN MERICA

Fulminadi da un fraco de tempesta,
l’erba dei prè par ’na metà passìa,
brusà le vigne da la malatia
che no lassa i vilani mai de pèsta;
ipotecado tuto quel che resta,
col forrnento che val ’na carestia,
ogni paese el g’a la so angonia
e le fameie un pelagroso a testa!

Crepà la vaca che dasea el formaio,
morta la dona a partor ’na fiola,
protestà le cambiale dal notaio,
una festa, seradi a l’ostaria,
co un gran pugno batù sora la tola:
“Porca Italia” i bastiema: “andemo via!”

E i se conta in fra tuti. – In quanti sio?
Apena diese, che pol far strapasso;
el resto done co i putini in brasso,
el resto, veci e puteleti a drio.
Ma a star qua, no se magna no, par dio,
bisognarà pur farlo sto gran passo,
se l’inverno el ne capita col giasso,
pori nualtri, el ghe ne fa un desìo!

Drento l’Otobre, carghi de fagoti,
dopo aver dito mal de tuti i siori,
dopo aver fusilà tri quatro goti;
co la testa sbarlota imbriagada,
i se da du struconi in tra de lori,
e tontonando i ciapa su la strada!